NG Kerk Wynberg
|
|
|
|
Die inligtingsbriewe wat op hierdie bladsy verskyn, is op Sondae by die deure van die kerkgeboue geplaas om die eenheidsproses aan lidmate te verduidelik. Die jongste inligtingsbrief verskyn onderaan, en die voriges kan gelees word deur op die balkies aan die linkerkant te kliek.Inligtingsbrief oor eenheidsproses van die Wynberg gemeentes. 24 Oktober 2008 Liewe lidmaat 1. Ek bring goeie nuus! Die geloofstap wat die kerkrade na ’n aantal gemeentekonferensies geneem het om ’n ooreenkoms vir ons gesamentlike toekoms te skryf, is besig om byval by kerkleiers en teoloë te vind, selfs uit oorde waar ons dit nie verwag het nie. Ons het ’n versigtige tree gegee op ’n pad waar ander gemeentes in die NG Kerk familie dit nog nie gewaag het nie – in biddende afhanklikheid dat die Here ons deurentyd mag lei – terwyl die gety as gevolg van die sinodes se probleme sterk teen ons gedraai het. Die volgende het gebeur:
(Dit begin om 11:00 en duur tot 16:00. Registrasie geskied vanaf 10:30. Belangstellendes kan voor 3 November by die Kerkkantoor van Wynberg (021-797-8340 ngkwyn@iafrica.com ) of by Divine Robertson van Communitas (021-808-3265 dr@sun.ac.za ) inskryf. Lidmate, kerkraadslede, predikante en kerkleiers is welkom om dit by te woon.)
2. Hoe het dit gebeur? Die afgelope ses maande het ons verskeie gemeentekonferensies oor die eenheidsproses tussen die Wynberg gemeentes gehou. Die lidmate wat teenwoordig was, het aangedui dat dit hulle wens is dat die NG Kerk en VG Kerk Wynberg in ’n nuwe gemeente moet herenig met behoud van NGK en VGKSA lidmaatskap (slegs 2 lidmate het ’n ander opsie verkies). Die gesamentlike kerkraad het op 3 Junie 2008 goedgekeur dat die opsie verder ondersoek moet word aan die hand van die volgende verklaring: Ons maak hiermee ons voorneme bekend om die gemeentes van die NG Kerk en VG Kerk Wynberg te herenig deur ’n nuwe gemeente te vorm. · Lidmate tree toe tot die nuwe gemeente met behoud van hulle lidmaatskap aan die NG Kerk of die VG Kerk. · Die gemeente word gevestig met die bedoeling om verbonde aan die NG Kerk en die VG Kerk te bly. 3. Die Kerkraad van Wynberg het die gesamentlike moderatuursvergadering van die NGK en VGK versoek om ons te help om die struktuur en proses te ondersoek wat aan ons voorneme gestalte kan gee. Die moderature het ons versoek na die gesamentlike vergadering van die twee sinodes se regskommissies verwys en gesamentlike kerkraad van Wynberg genooi om met hulle in gesprek te tree en te help met voorstelle. 4. Ons voorstel was gegrond op ’n beproefde model van die Protestantse Kerk in Nederland (PKN) wat ons verwerk het om by die reglemente van die NGK en die VGKSA in te pas. Hiervolgens word ’n gesamentlike of gefedereerde gemeente gevorm waarin daar oor die hele lewe en arbeid van die gemeentes saamgewerk word. Alles word saam bestuur. Die gemeentes kan net nie vaste eiendom saam besit nie omdat hulle nog twee aparte regspersone moet bly totdat die sinodes verenig. Ons kan die model vergelyk met ’n huwelik wat buite gemeenskap van goedere plaasvind. 5 Ons ooreenkoms is deur twee prokureurs afsonderlik oorweeg en gunstig beoordeel. Dit was op 31 Augustus 2008 deur ’n gemeentekonferensie bespreek. Die konsulent van die VGK Wynberg was teenwoordig. Die lidmate wat teenwoordig was, het aangedui dat die kerkrade met die ooreenkoms kan voortgaan. Die gesamentlike kerkraad het op 2 September 2008 die ooreenkoms eenparig goedgekeur en besluit dat ooreenkoms na die ringe vir oorweging en goedkeuring gestuur word. Die konsulent was ook teenwoordig. 6. ’n Honderd afskrifte van die volledige ooreenkoms (aangeheg) was vir insae en kommentaar gedurende Septembermaand by die deure van elke kerkgebou geplaas. Sou die Ring van die VGKSA enige wysigings aanbeveel, sal die gesamentlike kerkraad ’n buitengewone vergadering belê om die wysigings te bespreek. Die finale ooreenkoms sal dan onder elke lidmaat se aandag gebring word alvorens dit weer by ’n gemeentevergadering behandel sal word. Daarna sal die ooreenkoms deur die kerkrade onderteken word. U is steeds welkom om enige vrae of aanbevelings oor die inhoud van die ooreenkoms onder my aandag te bring. Met seënwense Dr. Danie Nel Voorsitter van die Gesamentlike Kerkraad. 24 Oktober 2008
Artikels van die Ooreenkoms Artikel 1. Die naam van die samewerkingsverband is: “Die gesamentlike gemeente te Wynberg.” Indien die samewerkingsverband amptelik aangedui moet word, word aan die naam toegevoeg: “ … waarin saamwerk die Nederduitse Gereformeerde Gemeente te Wynberg en die Verenigende Gereformeerde Gemeente in Suid-Afrika te Wynberg.” Artikel 2. Die kombinasie het betrekking op al die werksaamhede van die gemeentes. Artikel 3. Die kerkrade het ‘n gesamentlike reëling getref vir - die verkiesing van ampsdraers, - samestelling, arbeidsveld en werkswyse van die gesamentlike kerkraad en - die versorging van die totale vermoënsregtelike aangeleenthede. Hierdie reëlings is opgeneem in die aangehegte “Gesamentlike reëling ten opsigte van die werksaamhede van die gesamentlike gemeente te Wynberg”. Artikel 4. Die kerkrade kombineer in een gesamentlike kerkraad, waarby die bevoegdhede van die betrokke kerkrade gesamentlik uitgeoefen word. Artikel 5. Die gesamentlike gemeente te Wynberg erken die belydenisgrondslag van sowel die Nederduitse Gereformeerde Kerk as die Verenigende Gereformeerde Kerk in Suid-Afrika. Die gemeente staan gegrond op die Bybel as die heilige en onfeilbare Woord van God. Die leer wat die gemeente in ooreenstemming met die Woord van God bely, word verwoord in die Apostoliese Geloofsbelydenis, die Geloofsbelydenis van Nicea, die Geloofsbelydenis van Athanasius, die Nederlandse Geloofsbelydenis, die Heidelbergse Kategismus, die Dordtse Leerreëls en die Belydenis van Belhar. Artikel 6. Die ooreenkoms is aangegaan vir ‘n onbepaalde tyd totdat die gemeentes verenig of die ooreenkoms beëindig word.
|
|
Stuur pos na
dtnel@iafrica.com met vrae of opmerkings
in verband met hierdie webwerf.
|
