Die kerk-herlewingsproses wat die afgelope paar maande in die gemeente van stapel gestuur is, kry nuwe momentum en uitgebreide fondamente.

Die kerkraad het tydens sy vergadering op 7 Junie 2006 die proses goedgekeur, en sy steun belowe.

Ten einde die proses aan te vuur, en om dit meer breedvoerig te vestig, het die kerkraad die volgende besluit:

Gemeentelede word aangemoedig om deel te neem aan die proses, op die basis dat waar ‘n gemeentelid geroepe voel om ‘n leemte of tekortkoming aan te vul, hy of sy ondersteun word om daadwerklik ‘n verskil te maak. M.a.w. die proses lê grotendeels in die hande van gemeentelede, maar met die voorbehoud dat inisiatiewe en projekte goedgekeur en ondersteun word deur die kerkraad.

Die gemeente moet voortdurend op hoogte gehou word van die proses.

Die kerkraad is verantwoordelik om te verseker dat die proses gedy en voltooi word.

Die proses is onderhewig aan gereelde nabetragting om seker te maak dat daar ‘n verskil gemaak word, en dat die verskil blywend en deurgrondig is.

Die kerkraad het die volgende reëls aanvaar wat geld tydens die proses:

Wat betref die styl van lofprysing en aanbidding het die kerkraad kennis geneem daarvan dat daar uiteenlopende behoeftes bestaan onder gemeentelede. Dr Danie Nel het opgemerk oor die verskillende style:

*  “Daar is lidmate wie se verstand ‘n meer belangrike rol in hul ontmoeting met God inneem. Preke en Bybelstudies is vir hulle belangrik. Vernuwing gaan vir hulle gepaard met ‘n dieper kennis van God en ‘n suiwer leer. Hulle verkies om geordende woorde te gebruik wanneer hulle bid en fokus sterker op die woorde wanneer hulle sing. Sommige van hulle lewer ‘n belangrike bydrae aan die gemeente deur hul le-ring en aan die kerk deur studiestukke en verklarings voor te berei. Hulle word veral deur beginsels geïnspireer.

*  Daar is lidmate wie se hart ‘n meer belangrike rol in hul ontmoeting met God inneem. Getuienis, sang, musiek en onderlinge samesyn is vir hulle belang-rik. Vernuwing gaan vir hulle gepaard met spesiale herlewings-dienste waar die heiligheid van God sterk beklemtoon word. Hulle verkies spontane gebede en beleef lofprysing en aanbidding meer intens. Sommige van hulle lewer ‘n belangrike bydrae aan die gemeente deur hul betrokkenheid by liturgiese vernuwing en kleingroepe waar hul entoesiasme nuwe vuur en lewe bring. Hulle word veral deur persoonlike verbintenisse, toewyding en deernis ge-ïnspireer.

*  By sommige lidmate neem die element van misterie ‘n meer belangrike rol in hul ontmoeting met God in. Stilte (ook in die erediens) en retraites is vir hulle belangrik. Vernuwing gaan vir hulle gepaard met die vermoë om God beter te hoor, sy wil duideliker te kan vertolk en die belewing van ‘n innige gemeenskap met God.  Hulle verkies “luistergebed” en ‘n gewyde atmosfeer wanneer hulle God aanbid. Sommige van hulle lewer ‘n belangrike bydrae aan die

gemeente deur hul voorbidding en profetiese getuienis. Hulle stimuleer ander om in hul belewenis van God se teenwoordigheid te verdiep. Hulle word veral deur wysheid en broosheid geïnspireer.   

*  Daar is lidmate wat die Here veral ontmoet wanneer hulle ‘n diens aan die samelewing lewer. Sosiale projekte as bystand aan persone in nood en gemeenskapsontwikkeling is vir hulle belangrik. Vernuwing gaan vir hulle gepaard met ‘n toename in betrokkenheid by daadwerklike liefdesdiens, groter geregtigheid en soms strukturele veranderings in die gemeenskap. Vir hulle is gebed en lofprysing sonder dade betekenisloos – gebed lei tot diens. Sommige van hulle lewer ‘n belangrike bydrae aan die gemeente en kerk omdat hulle ons gewete oor sosiale sake is en ander deur hulle diens aanmoedig om ook ‘n verskil te maak. Hulle word veral deur daadwerklike liefde en ‘n sterk sin vir geregtigheid geïnspireer.”

Die kerkraad het besluit dat die gemeente ‘n tuiste vir al sy lidmate moet bied, gegewe die verskillende behoeftes onder sy gemeentelede.

Die kerkraad het onderneem dat daar nog besin moet word oor die waardes waarteen voorstelle en idees vir herlewing beoordeel word. Wat dien die Koninkryk van God?  Dit is belangrik dat daar nagedink moet word wat die gemeente tydens en na afloop van die proses gaan beskou as “sukses”. Is dit groter bywo-ning van die eredienste? Finansiële gesondheid? En ewe belangrik, wat is nie sukses nie – bv onenigheid, tamheid, onverskilligheid.

Die gemeente se visie word as riglyn aan die hand gedoen in hierdie besinnings-proses.

KERK-HERLEWINGS-KURSUS

Met die vlam van herlewing wat al hoe sterker in Wynberg brand is dit interessant om skielik van soveel sukses-verhale van vele ander gemeentes te hoor. Die herlewingproses in ons gemeente is miskien vir ons nuut en vreemd, maar soveel ander gemeentes het alreeds hierdie proses suksesvol voltooi. Hierdie gemeentes is nie net NG gemeentes in ons land nie, maar gemeentes regoor die wêreld.  

Die sukses-verhale wat hiedie gemeentes vertel is verstommend. Baie noem dat daar aan die begin baie onsekerheid in die gemeente was. Party lidmate was opgewonde oor herlewing, party was skepties, party het bedreig gevoel, ander was oorhaastig, maar tog het hulle volhard en nou kan hulle met net dankbaarheid terugkyk. Die groeipyne was deel van die herlewingsproses. 

Dit herinner aan die groeipyne wat ons tans in ons herlewingsproses ervaar. As ons vergelyk wat in ander gemeentes vroeg in die herlewingsproses gebeur het, is dit duidelik dat ons nie ‘n uitsondering is nie. Net soos in al die ander gemeentes het ons proses met gebed begin. Geleidelik het iets begin gebeur en is ons nou al op ‘n stadium waar mense buite ons gemeente begin het om navraag te doen oor Wynberg se herlewing! Deur uit die ondervinding van ander gemeentes te leer, kan ons ons herlewing so aanpas om onnodige groeipyne te voorkom.  

Daar is tans ‘n kursus beskikbaar waar ‘n gemeente die agtergrond van hul herlewingsproses deel. Dit is beskikbaar as ‘n videokursus en behels die agtergrond, groeipyne, wenke en praktiese voorstelle van die proses. Ons beplan om saam met die VGK so ‘n kursus aan te bied, waardeur ons ons visier nog skerper kan instel, deur gebruik te maak van ander se ondervinding.

Besonderhede van die kursus sal binnekort  in die Sondagbulletin geadverteer word.                                                

Willie Koen

GEBEDS-AKSIE

In die proses van kerk-herlewing is dit belangrik om te leer  uit ander se ervaring. Ds Dirkie van Morelettapark het in ‘n spesiale boodskap aan ons gemeente die belangrikheid van gebed benadruk. In ‘n later gesprek met die gemeente het Ds Etienne Piek van Transformation Africa ook die belangrikheid van gebed beklemtoon. 

Daar is toe besluit om dit een van die aksies van die gemeente te maak om op ‘n gereelde basis vir kerk-herlewing te bid. 

Ons het afgeskop met 10 dae van gebed wat direk na Pinkster begin het.  Die eerste stap was om die “eie ek” af te lê, om ons sondes te bely en vir mekaar te bid. Ons het gevra dat die Here ons gedagtes sal vernuwe en vir ons  wysheid en insig  sal gee, sodat ons sal weet wat Sy wil vir ons gemeente is. Dit was wonderlik om deel te wees van hierdie 10 dae van gebed en die Here het  vir ons talle bevestigings gegee wat ons opnuut laat besef het dat Hy getrou is. Die Here het werklik met ons gepraat en iemand het die teksgedeelte in Haggai 2:4 gekry waar die Here sê: ”Begin met die werk, want Ek is by Julle, sê die Here, die Almagtige”  Dr Danie Nel het ook met ons die teksgedeelte in Openbaring gedeel oor die gemeente in Laodisea wat so ryk was, maar tog so arm omdat hulle nie die Here gesoek het nie. Die ander teksgedeelte wat ons gekry het was Lukas 24:44;”En Ek sal die gawe wat my Vader beloof het, vir julle stuur. Maar julle moet in die stad bly totdat julle met krag van bo toegerus is”

Die ander teksgedeelte was Jeremia 29:11-13:” Ek weet wat Ek vir julle beplan, sê die Here: voorspoed en nie teenspoed nie; Ek wil vir julle ‘n toekoms gee, ‘n verwagting! Dan sal julle My aanroep, tot My kom bid, en Ek sal julle gebede verhoor. Julle sal vra na my wil en julle sal dan My wil ken as julle met julle hele hart daarna vra.” Dit was vir ons bevestiging dat die Here vir ons sê dat ons nie met ons eie planne moet begin nie, maar moet wag op die Here om vir ons te lei in alles wat ons doen en om werklik Sy wil vir ons gemeente te soek.

Aan die begin was ons bekommerd dat ons nie mense sal kry wat die 10 dae van gebed sou bywoon nie, maar ons was verstom deur die opkoms. Op die Vrydagaand het ons die grootste getal mense gehad wat deur die loop van die 10 dae opgedaag het. Dit was asof die Here vir ons kom wys het dat as ons op Hom vertrou Hy selfs ‘n klomp mense sal kry om op ‘n Vrydagaand in Wynberg gemeente te kom bid!!! 

Dit was werklik ‘n voorreg om deel te kon wees van die 10 dae van gebed. Vir die van julle wat dit nie kon bywoon nie, moenie bekommerd wees nie. Daar is ‘n joernaal gehou van alles wat die Here vir ons in hierdie tyd geleer het. Ons sal dit op ‘n later stadium met die gemeente deel. 

Die geleentheid vir gebed vir kerk-herlewing gaan voort en ons nooi almal uit om elke Dinsdagaand om 19:30 by ons te kom aansluit om te bid vir ons gemeente en die Here se leiding op die pad wat ons besluit het om in liefde saam met Hom te loop.  

Piet van Zyl